கடாரம்

கடாரம்
பதினோறாம் நூற்றாண்டு…
நாகை விகாரையில் நிகழும் ஒரு கொலை…
கடாரத்துக்கோட்டையில் இளவரசியின் கண்ணெதிரே விளையுமோர்  பாதகம்…
திடீரென்று அலைகடல் மேல் கலம் பல செலுத்தி கடாரம் வரும் சோழப்படை…
இந்நிகழ்வுகள் யாவற்றுக்கும் என்ன தொடர்பு?
 தஞ்சைப்பெருவணிகரின் செல்வனான நித்திலங்குமரனுக்கு அங்காடிக் கணக்கு அலுக்கிறது. சுவாரஸ்யம் தேடிச் சுற்றியலைபவனுக்கு விஷயமும் கிடைக்கிறது. எதிர்பாராத விதமாய் அவன் சந்திக்க நேரும் கைதி… அவன் சொன்ன செய்தி…தொடர்ந்த அந்தக் கைதியின் நிலை…இவை கண்ட நித்திலங்குமரன் தேடத் துவங்குகிறான். அவனை மாய வலையொன்று சுற்றிப் படர்கிறது, அது கடாரத்துக்கு அவனை இழுத்துச்செல்கிறது.
அங்கே அவனைத் தொடரும் மர்மங்கள். கண்களுக்குப் போதையூட்டுமளவுக்கு கருத்திலே ஐயத்தைக்கூட்டும் -வேகமும் விவேகமும் நிறைந்த கடாரத்து வணிகர் மகள்- மித்ராதேவி எந்த அளவு நம்பத்தகுந்தவள்?

துறவிக்கும், கைதிக்கும், கடாரத்துப் பெருந்தலைகளுக்கும் பரிச்சயமான நடனப்பெண் மேகலையின் ரகசியம் என்ன? தமைச்சுற்றும் மாயா வினோதங்களின் மூலத்தைக் கண்டறிய நித்திலங்குமரனும் மித்ராதேவியும் துவங்கும் விபரீத பயணத்தில் இவர்கள் சந்திக்கும் மனிதர்கள், தொடரும் அபாயம், காண நேரும் காட்சிகள் இவையாவும்  தொடர்பற்ற நிகழ்வுகளா அன்றி தொடரும் சங்கிலியின் புலனறியா முடிச்சுக்களா?
இவர்களின் தேடல் இப்படியே நின்று விடுமா?
அன்றி சோணாட்டுக்கும் – அதன் நட்புக்குரிய கீழைக்கடலின் பேரரசுகளுள் ஒன்றான- ஸ்ரீவிஜயதேசத்துக்கும் ஏற்பட்ட யுத்தம், அதன்   பின்னணியில் ஒளிந்திருக்கும் பெரும் சூழ்ச்சி வரை நீண்டு செல்லுமா?
முடிவில் கத்தி நீள்வது தம் தேசத்து மக்களின் உயிரினும் மேலான  ஒருவரின் கழுத்துக்கு நேரே என்ற நிலையில், அருகே நிற்பதுஎதிரியா, நண்பரா என்ற ஐயம் பலமாய் எழுகின்ற சமயத்தில் இவர்களால் என்ன செய்ய முடியும்?